Autoalt S Provinzalgèlt 2025 ver ungefer simhunderttausnt euro

PALÙ DEL FERSINA. Pet de ausrotn numer 353, 354 ont 355 de Provinzaljunta hòt austoalt s Provinzalgèlt ver de sprochminderhaitn . S ist gèlt as kimmp praucht ver za trong envir projektn as gem bèrt en de lokal sproch ont en de kultur van gamoa’schòftn va sprochen minder kennt.

S gasetz sok as s doi gèlt kimmp toalt en viar toaln. S earste toal «a» ver za trong envire projektn as kearn s druck ont de nochrichtn as de minderhaitsproch. S zboate toal «b», kimmp praucht ver za zoln de projketn as kemmen enviretrong derèckt va de provinz. S dritte, s toal «c», ver projektn as kemmen gamòcht van òndra omtn abia zan paispil de òllgamoa’omtn, de vraischòftn, de kulturinstitutn ont asou envire. Verleist, s toal «d» kimmp ausgem en de projektn as kemmen enviretrong en Fassatol van Comun General ont ver de sèlln as hom vour za schitzn de sproch.

De Provinz toalt aus s doi Provinzalgèlt no de vourtschbinn va de Konferenz van sprochminderhaitn as schauk aus òlla de projektn. De viarskeste konferenz hòt se gahòltn as de 28 van genner en Sol Trentino, kan sitz va de Provinz.

No de vourtschbinn va de Konferenz, iaz de doin projektn sai’ aribart en Provinzajunta. Sechber iaz ganau bos as de doin aurotn hom vour ver en 2025.

Asn toal «a» barn gea’ ungefer viarhundertvisktausnt euro, asn sèll « b » zboa’sktausn, asn « c » ungefer simsktausnt ont ungefer hundertòsktausnt asn viarte toal.

S earste toal, ist s gèlt as kimmp praucht en Plan va de informazion as sai’ de projektn as kearn s druck ont de nochrichtn as de minderhaitsproch. S gasetz sok as de insern gamoa’schòftn, as klòffen a sproch minder kennt, mias hom de informazion en de aigene sproch. Meing en sèll kemmen verorbetet projektn abia de saitn as de zaitungen, de nochrichtzait oder zaitschriftn.

Ver de informazion en de lokal sproch, de inser gamoa’schòft bart kriang ungefer visktausnt euro s Kulturinstitut ont zboatausnt de Gamoa’ va Palai. No en gèlt as ist kemmen gem haier, s hòt schoa’ an projet ver en 2025 ver za lòng sechen de sendungen va de PRF 1 ont ORF SPORT en inser lònt.

S aboate toal van Provinzalgèlt, as haier ist va zboa’sktausnt euro, bart kemmen praucht ver projektn enviretrong dirèckt va de Provinz. S toal „c“, as ist laischiar simsktausnt euro, bart kemmen praucht ver projektn va òndra omtn abia zan paispil de òllgamoa’omtn, de vraischòftn, de kulturinstitutn ont asou envire. Haier der Schualninstitut Pergine 1 ont s Bersntoler Kulturinstitut barn enviretrong mearer projektn. A toal kemmen enviretrong òll jor, òndra sai’ gònz nai ober òlla hom der zil za gem bèrt en de kultur ont en de sproch ont za veròrbetn naia strumentn ver za learnen sa.

Riassunto dell'articolo in lingua italiana:

La Giunta Provinciale ha adottato di recente alcuni provvedimenti previsti dalla L.P. 6 del 2008, riguardanti le minoranze linguistiche provinciali: è stata determinata la ripartizione delle quote del Fondo provinciale per la tutela delle minoranze linguistiche locali, sono state individuate alcune iniziative da ammettere a finanziamento ed è stato approvato il programma di interventi per l'informazione in lingua minoritaria. Quest’ultimo è un documento particolarmente significativo in quanto la legge prevede per ciascuna comunità di minoranza il diritto di avere informazioni scritte e audiovisive nella propria lingua.